YIĞIM Payment Services ölkədə ilk dəfə olaraq Visa Token Service (VTS) texnologiyasını internet ekvayrinq əməliyyatları üçün istifadəyə verir. Bu, təkcə texnoloji yenilik deyil — bu, YIĞIM-ın dünya nəhəngi olan Visa ilə əməkdaşlıq edərək Azərbaycanda belə bir qabaqcıl layihəni bazara ilk dəfə çıxarması ilə xüsusi əhəmiyyət daşıyır. Layihə onlayn ödənişlərin təhlükəsizliyini və istifadəçi rahatlığını yeni səviyyəyə qaldırmaqla sektorda əsl inqilab yaradır.
Visa Token Service (VTS) nədir?
Visa Token Service – qlobal rəqəmsal ödənişlər lideri Visa şirkəti tərəfindən hazırlanmış qabaqcıl texnologiyadır. Bu texnologiya ödəniş kartının məxfi məlumatlarını unikal rəqəmsal identifikator – token ilə əvəz edir.
Tokenlər onlayn ödənişlər üçün, o cümlədən abunəlik ödənişləri üçün istifadə olunur. Bu texnologiya kart məlumatlarını satıcılardan və üçüncü tərəflərdən gizlədir. Beləliklə, müştərilərin məxfi məlumatları qorunur və fırıldaqçılıq və məlumat sızması riski əhəmiyyətli dərəcədə azalır.
Bu necə işləyir?
1. Müştəri tokenləşmə texnologiyasını dəstəkləyən vebsayt və ya tətbiq vasitəsilə alış-veriş edir.
2. Saxlanılan kart nömrəsi Visa sistemi tərəfindən yaradılmış unikal tokenlə əvəz olunur. Bu tokenlərin təhlükəsiz saxlanmasına və yalnız həmin tərəfdaş tərəfindən qəbul edilməsinə şərait yaradır.
3. Token tranzaksiyanın həyata keçirilməsi üçün istifadə olunur, beləliklə, real kart nömrəsinin satıcıya ötürülməsinə ehtiyac qalmır.
4. Token itirildikdə və ya ələ keçirildikdə, üçüncü şəxslər ondan istifadə edə bilməzlər.
VTS texnologiyasının internet ekvayrinqi üçün istifadəyə verilməsi, YIĞIM Payment Services-in innovasiyalara və qlobal ödəniş texnologiyaları liderləri ilə əməkdaşlığa sadiqliyini bir daha nümayiş etdirir. İndi bizimlə əməkdaşlıq edən bizneslər müştərilərinə daha təhlükəsiz və etibarlı onlayn ödəniş imkanları təqdim edə biləcəklər.
YIĞIM Payment Services öz tərəfdaşlarına Visa Token Service texnologiyasını istəyə əsasən aktiv və ya passiv rejimdə istifadə etmək imkanı verir. Bu yanaşma texnologiyanın konkret biznes ehtiyaclarına uyğunlaşdırılmasına imkan yaradır. Bu isə daha çox uğurlu ödənişin baş tutmasına səbəb olur, çünki tərəfdaşlar prosesi sınaqdan keçirə və optimallaşdıra bilirlər, nəticədə isə müştərilər üçün maksimal rahatlıq təmin olunur.
"Visa-nın innovativ VTS texnologiyasını müştərilərimizə təqdim etməkdən məmnunuq. Bu, Azərbaycanda rəqəmsal ödənişlərin inkişafında mühüm addımdır. Qürur hissi ilə qeyd edirik ki, bu texnologiyanı ölkədə ilk dəfə məhz YIĞIM Payment Services Visa ilə birgə bazara təqdim edir. Əminik ki, bu xidmət YIĞIM Payment Services istifadəçiləri üçün onlayn ödənişləri daha təhlükəsiz və rahat edəcək," – deyə YIĞIM Payment Services direktoru Vüqar Cəfərov bildirib.
"Azərbaycanda nağdsız iqtisadiyyatın inkişafı şirkətimiz üçün strateji prioritetdir. Biz qürur hissi ilə deyə bilərik ki, YIĞIM ilə birlikdə Visa kart sahiblərinə qabaqcıl tokenləşdirmə texnologiyasını təqdim edirik. Əminəm ki, bu xidmət tərəfdaşlarımıza və müştərilərimizə gündəlik alış-verişlərini daha rahat, sürətli və təhlükəsiz şəkildə həyata keçirməyə kömək edəcək," – deyə Visa-nın Azərbaycandakı regional meneceri Nurlan Hacıyev bildirib.
YIĞIM Payment Services – Azərbaycanda ilk olaraq beynəlxalq PCI DSS təhlükəsizlik sertifikatını almış, innovativ ödəniş həlləri təqdim edən aparıcı fintex şirkətidir. 2017-ci ildən fəaliyyət göstərən YIĞIM Payment Services, bazar lideridir və Bolt Taxi, Bolt Food, Wolt, Uber, Yango, Hilton, Fairmont, Hertz, Wingz Scooter və s. daxil olmaqla 300-dən çox yerli və beynəlxalq şirkətdən ödənişləri qəbul edir.
Şirkətin missiyası – ölkədə nağdsız iqtisadiyyatın inkişafına töhfə verən rahat, etibarlı və təhlükəsiz rəqəmsal ödəniş ekosisteminin yaradılmasıdır. Əsas fəaliyyət istiqamətləri onlayn və mobil ödənişlər üçün qabaqcıl texnologiyaların inteqrasiyası, rəqəmsal maliyyə xidmətlərinin inkişafı, tranzaksiyaların maksimal təhlükəsizliyinin təmin olunması və fintex sahəsində innovasiyaların dəstəklənməsidir.
